رأي عااام ... خاص جدااا, إجهاض المغتصبة

وافقت دار الإفتاء المصرية على جواز إجهاض المغتصبة بشرط ألا تتعدى مدة الحمل أربعة أشهر، وقال د.محمد عباس أمين الفتوى ونائب كبير الباحثين بدار الإفتاء رداً على مشروع قانون وافقت عليه لجنة الاقتراحات والشكاوى بمجلس الشعب إن هناك عدة فتاوى سابقة أكدت جواز الإجهاض على هذا الشرط أي 120 يوماً بعد نفخ الروح بإجماع الفقهاء، وكان النائب محمد خليل قويطة وكيل لجنة العلاقات الخارجية قد قدم مشروع قانون بتعديل قانون العقوبات وأكد أن جريمة الاغتصاب تعتبر من جرائم الاعتداء على الحرية الخاصة للأنثى بما يخالف كل الأعراف والشرائع والقوانين.


الموضوع ما خلصش عند كده
ولسه هيكون فيه جدل كبير

لأن مثلا مجمع البحوث الإسلامية وهو واحد من أكبر الهيئات الدينية التابعة للأزهر.. دخل على الخط في القضية...

ووافق على إجهاض المغتصبة بشرط ألا يكون مر على عمر الجنين أكثر من 120 يوما على اعتبار أنه قبل العمر ده لا يكون الله سبحانه وتعالى قد نفخ في الجنين الروح.. أما بعد كده فالمجمع رفض الإجهاض تماما.. وده رأي ضد رأي شيخ الأزهر.. لأن الاثنين أباحوا الإجهاض في أي وقت..ورأيهم ده مستند إلى قاعدة شرعية تتعامل مع الفتاة المغتصبة بوصفها "لا تتحمل أي وزر إزاء تخلصها من ثمرة هذه الجريمة الوحشية‏,‏ ولا تعتبر ـ بأي حال من الأحوال ـ قاتلة للنفس التي حرم الله تعالى قتلها إلا بالحق‏"

وبرضه الموضوع ماوقفش عند كده

لأنه فيه آراء خايفة من إن لو قانون سمح للمغتصبة بإجهاض الجنين فإن ده يفتح الباب ع البحري للبنات "اللي مش كويسين" في إنهم يغلطوا زي ما هم عايزين وبعدين يدعوا أنه تم اغتصابهم فيجهضوا الجنين ويبقوا زي الفل بعدها.

وأصحاب الفريق ده شايفين.. إنه مهما كان فيه ضوابط وقوانين فأنت في مصر حضرتك وهتلاقي مية ألف ثغرة ومية ألف واحد متطوع لتمرير ما لا يمكن تمريره في مقابل كام ورقة بمائة جنيه..

بس فيه فريق تاني شايف.. إن لو منعنا إجهاض المغتصبة- وهو حق شرعي- عشان خايفين من الناس اللي هتاخد من القانون باب خلفي للرذيلة.. يبقى بنظلم البنات المغتصبات فعلا.. خاصة أن الأصل في الأشياء هو فرض القوانين لحماية المتضررين أما الانتهازيون فدول يجب التصرف معهم بشدة وعنف وحزم.. مش نكافئهم بحرمان المتضررين من حقوقهم..

دلوقتي عايزه أعرف مين مع القانون ده
ومين ضده

وليه مع أو ضد

انا مش عارف هما المفروض يوفقوا بين الراى القانون والراى الدينى

انا مع اجهاض المغتصبة مهما كان الوقت..لانها مظلومة وضحية ..ومبيتهياليش ان الدين ولا المجتمع يقبلوا بالظلم مش ليها بس لا ده كمان للمولود.اللى مش هيعرف يعيش صح..خالص..
احنا ملناش دخل بالبنات اللى مممكن يتسغلوا ده لصالحهم..احنا لينا دعو ة بحقوق ضحايا الاغتصاب..اما الباقي بقي معتقدش ان ليهم اى حق..لانهم ضيعوا حتى ابسط حق ليهم وهو الشرف ...
ميرسي لموضوعك يامحمد جدا .وفعلا موضوع مهم جدا..