تخيل معايا كده............

تخيل معايا كده وانت بتشرب الشاي وياريت يكون شاي لببتون العروسه وحصل الي انا هقوله دلوقتي

تخيل نفسك كده وجاتلك اختك وقالت لك (انا بعيش الفتره دي قصه حب مع شاب ومعجبه بيه جدا )

انت ساعتها حتعمل ايه ؟؟؟؟
هتسمع كلام نفسك اللي حتقول (انت راجل انت...ده انت مفيكش ريحة الرجوله....ازاي تسيب اختك كداا)
وساعتها حتقوم تسحبها من شعرها وتزرعها القلم التمام وتجري على والدك تقوله (اتصرف مع بنتك....البنت جابت لنا العار)

ولا ساعتها حتهدى اوي وحتفكر اوي وتكتم غيظك وتحاول تعرف الهدف من العلاقه دي!!!

وممكن حل تالت انك تسيبها بس تعمل حصار فظيع عليها و تحاول انك تبعدهم عن بعض مهما كانت النتيجه

انا عاوزاكم تحطوا نفسكم بجد في الموقف وتقوللي رد فعلك ايه

والكلام ده مش بس للولد انا عاوزة اعرف رأي البنات كمااان بما ان الموضوع يخصكم وانتوا جزء اساسي منه....انتوا يابنات شايفين اخوكم المفروض يتصرف ازاي...........؟

انا هقعد واسمع منها واتعرف عليه واشوف الهدف من العلاقة دى ايه

تقريبا مجد قال حل مناسب جدا
ودي طبيعة بتختلف من فرد لفرد

اولا شكرا على موضوعك الجميل دة يا زورو

اهم حاجة فالموضوع دة ان الاخ يتفهم الوضع بدل متحصل خساير محدش عارف هتوصل لاية
دة غير ان كلنا عرفين ان الحب دة شعور طبيعى كلنا بنمر بية فلازم الاخ يحتوى الموقف
لمصلحة اختة فالنهاية

انا عن نفسي لو ولد بجد...
والحمد لله انا مش كدة...
كنت هرزعها القلم التمام الاول....
علشان مكنتش صريحة معايا فى البداية...ومقالتليش قبل كدة....
وبعدين اسيبها مع نفسها شوية دماغها توديها وتجيبها وحيرانة انا هاعمل ايه...
وبعد كدة اقعد وافهم منها اللى حصل وانهم ناويين على ايه...
وبما انى هكون ولد فهخليه يقابلنى واشوف ايه نظامه لو كان كويس...كان بها...
ولو وحش....يبقي على نفسه...
بس كدة...
شريرة انا مش كدة...؟؟

ميرسى ليكم كلكم على مروركم الكريم
معجب جدا بافكاركم انه لازم يقعد ويسمعها ويتفهم الموقف ورئى منايا جميل برده بس من غير القلم اللى هترزعه لاختها لو كانت ولد عشان زى ماهبة بتقول الامر مايكبرش ولازم زى مابتقوله انه يتعرف عليه ويصاحبه ويعرف شخصيته
بالنسبة ليا انا اختى الوحيدة اكبر منى ومتجوزة وعندها ولدين وبطبيعة الحال انا اللى كنت باحكيلها على مواضيعى والبنات اللى كانت بتعرف عليهم وكانت بتبقى متفهمة وبتنصحنى اعمل ايه لانى ماليش اخوات تانى فكانت بتبقى خايفة اصحابى يدونى نصيحة غلط
اما بقى لو كان ليا اخت اصغر منى وجت قالتلى انا مرتبطة بولد وبحبه و و و الى اخره ماكدبش عليكوا انا هبقى مندهش فى الاول بس هاحاول اهدى واسمع منها ايه الحكاية واحاول اتعرف عليه من بعيد لبعيد من غير مايحس انى عارف حاجة واهم نصيحة هاقولهلها بما انى ولد وعارف انها ماتصدقش كل كلامه وتاخد بالها من تعاملها معاه
بس بينى وبنكوا هابقى مقلق ومش بعيد اخنق عليها وقولها انها ماتخرجش معاه وماتشفوش الا قليل وغيرة الاخوات هاتطلع عليه يتحمل بقا ذنبه على جنبه