عن الصح والغلط ..., و " البطاطس والأسد والغزالة ونص مليون جنيه " !

غريب جداً موضوع الصح والغلط ده .. لأسباب كتير جداً الحقيقة .. اولا علشان هل كل حاجة فى الدنيا
يا اما صح يا اما غلط ؟؟ .. مفيش فى النص ؟؟ .. غالباً اه .. انا عارف انا بـ أسأل السؤال وبـ جاوب . بس دى اجابتى انا .. انتوا طبعاً ممكن يبقى عندكوا اجابات تانية .. يعنى البطاطس مثلا صح ولا غلط ؟؟..
والله على حسب الحالة لو حد ما بـ ياكلش غير بطاطس تبقى غلط .. لو حد تخين وبـ ياكل بطاطس تبقى غلط برضه .. لو حد بقى محتاج carbohydrates او على الاقل مش هـ تضره يبقى البطاطس صح

نيجى بقى لأول عقدة فى موضوع البطاطس ان فيه تفاصيل بقى .. يعنى لو البطاطس مرشوشة مبيدات ولا مضروبة هرمونات .. تبقى البطاطس غلط فى كل الاحوال .. ولو طبقنا ده على كل حاجة فى الدنيا . نكتشف على طول ان موضوع الصح والغلط ده مش بسيط ابدا .. لأنك علشان تعرف أى حاجة صح ولا غلط لازم تذاكرها كويس ..

ده كان أولاً .. ثانياً بقى ان ممكن يكون اولا معناه ان الصح والغلط مش مطلقين مش ابيض واسود
علشان مثلا .. انك تقتل حد غلط .. بس لو بـ تقتل دفاعاً عن نفسك .. يبقى صح .. بس حتى لو بـ تقتل حد دفاعا عن نفسك لكن الموضوع ماكانش مستاهل يعنى انك تقتله لأنه ماكانش هـ يضرك اوى يبقى قتله غلط برضه .. فبالرغم من ان كل الحاجات فى الاخر بـ تبقى صح او غلط الا ان الحكاية مش يا ابيض يا اسود .. علشان غالباً مفيش حاجة فى الدنيا يا ابيض يا اسود اصلاً .. فيه ألوان كتير جداً .. وكل لون معناه مختلف ..

فـ مفيش يا ابيض يا اسود آه .. بس فى يا صح يا غلط .. ويمكن الدليل على ان الحاجات كلها يا صح يا غلط . هو انه فى الاخر فى الأخرة . فيه جنة ونار بس .. مفيش فى النص .. مفيش أرض محايدة .. فى كويس ومفيد وفى وحش ومُضر .. هنا بقى تيجى العقدة الكبرى .. بتاعة ان تقريباً كل الحاجات الغلط حلوة او ممتعة او ظريفة لو لطيفة او مش بطالة خالص .. ده اولا .. ثانياً .. ان البنى ادم اصلاً ربنا خالقه بـ يحب يعمل الحاجات الغلط دى .. مع انه لما بـ يعمل الحاجات الغلط دى .. مع انه لما بـ يعمل الحاجات الصح بـ يبقى مبسوط اكتر .. ضميره بـ يبقى مستريح .. بـ يبص لنفسه فى المراية بصه كويسة بـ يحترم نفسه .. بـ يستفيد جداً من انه بـ يعمل صح .. بس برضه الغلط ظريف وسهل وممتع ..

يمكن هو ده مغزى الامتحان اللى احنا بـ نمتحنه فى الدنيا اصلا .. سهل جداً مثلا انك تبقى انانى لأن ربنا خالقك كده اصلاً .. الأنسان اساسا كائن نفعى انانى .. والدنيا كمان معمولة كده .. الأسد ضميره ما بـ يأنبوش لما يصطاد الغزالة المسكينة الحلوة وياكلها ويقرقش عضمها .. لأنه لازم ياكل وربنا عامله بـ ياكل غزال عادى
ده الفرق الاكبر اللى بينا وبين الحيوانات والسمك والشجر حتى .. ان كل دول ربنا عاملهم علشان يعملوا اللى يقدروا عليه فـ يعيشوا .. البنى ادم يقى ربنا القى على عاتقه انه مش بـ يعمل بس علشان يعيش لأ ده بـ يعمل كمان علشان يعمل صح أو غلط فيعيش مرتاح او يعيش ضميره مأنبه وبعدين يروح الجنة او النار ..

أحكى لكم دلوقتى بقى القصة اللى تسببت فى انى بـ آكل دماغكم فى الموضوع الغريب ده ..
واحد صاحبى عنده مركز صيانة عربيات زى توكيل كده .. المهم الراجل ده كان عنده بنت بـ تشتغل معاه بقالها 12 سنة .. كانت فى الاول سكرتيرة وبعدين مسكت الحسابات وبعدين بقت مديرة المركز اصلاً هى اللى بـ تقبض العمال وهى اللى بـ تروح تاخد الفلوس من البنك وتحط فلوس فى البنك ومعاها مفاتيح المخازن واخوها امين المخازن وهى اللى بـ تعمل كا حاجة من الأخر .. توقعتم طبعاً حصل ايه .. سرقت الاخت الفاضلة حاجات مثلاً تمنها نص مليون جنيه ( ده مش تمنها لما تتباع .. ده تمنها الشرائى ) جابت عربية فضت المخزن ومشيت .. ده ايه بقى ده ؟؟ .

صاحبى المسكين شعره ابيض .. شعره ابيض فعلاً فى اسبوعين .. مش زعل على الفلوس بس .. الخيانة مرعبة .. لما حد يسرقك هـ تزعل . بس لما بنت تعاملها على انها اختك الصغيرة وبـ تثق فيها ثقة عمياء وتبقى بـ تشتغل معاك بقالها 12 سنة .. اللى هم اقل شوية صغيرين من نص عمرها . تسرقك .. قلبك بـ يتكسر .. كسرت له قلبه وخانته علشان يبقى عندها فلوس لأ وايه ممكن جدا تنجو بفعلتها علشان سرقت كمان كل دفاتر العهدة وكل دفاتر الحسابات فمفيش اى دليل مادى ضدها .. اللهم الا كام شاهد من الشارع قالوا انهم شافوها بــ تاخد
حاجات من المخزن بعد مواعيد العمل الرسمية
انا من ساعة ما حكى لى القصة دى وانا بـ فكر فيها اغلب الوقت .. ازاى كده اصلاً ازاى البنى ادم يبقى زيه زى الاسد بل اوحش من الاسد كتير !
الحقيقة الاسد بـ يموت الغزالة علشان ياكل .. مش علشان يبقى غنى .. ازاى الناس اللى بـ يعملوا الحاجات دى بـ يقدروا يعملوا كده ؟ .. بـ اتحول لطفل ساذج انا لما بـ اسمع قصة من دول .. بـ حس انى مش فاهم اى حاجة .. بت حس ان كل اللى اعرفه عن البنى ادمين معلومات عامة اى حتى طراطيش كلام .. لما اكون انا مهموم او بأنى احدد قد ايه صح وقد ايه غلط فى البطاطس وألاقى بنى ادم زميل بـ يعمل حاجة حقيرة كده ويروح ينام عادى ..
يبقى اكيد انا مش فاهم حاجة .. اكيد انا عبيط فقلت ارجع من الاول بقى .. اعرف الصح والغلط والبنى ادم والجنة والنار .. يمكن المرة دى اوصل لحاجة اكون فاهمها وفى نفس الوقت لايقة على اللى بـ يحصل فى الغابة اللى احنا عايشين فيهااااااا ..

عموماً .. علشان الواحد يقدر يصحى الصبح ويبتسم فى وش الناس لازم يعتقد انه بالرغم من قسوة انعدام الضمير لدر كتير من الزملاء البنى آدمين الا ان الحمد لله .. الدنيا هـ يفضل فيها خير برضه .. علشان الناس تعرف تعيش ..

الواحد ما بـ يحسش بالحرب بين الخير والشر غير لما بـ يتفرج على فيلم او يقرأ اخبار الحروب الدائرة فى الدنيا او يسمع قصة مقرفة عن الخيانة .. بس الحقيقة الحرب دائرة كل يوم طول الوقت بين كل بنى أدم ونفسه .. وكل لحظة بـ يقرر اى واحد فينا اى قرار فى الدنيا .. بـ يبقى فيه اختيارين يا خير يا شر .. يا صح يا غلط وكل مرة بـ تختار الصح بـ تنتصر للخير .. حتى لو نصر قد عقلة الصباع .. حتى لو قد النملة .. بـ تبقى بنى ادم اكتر ومش بس بنى ادم ده انت بـ تبقى بنى ادم كويس عكس طبيعتك ..

وأخيراً .. الحمد لله ان فيه صح وغلط . والحمد لله ان فيه جنة ونار . والحمد لله ان ربنا يمهل ولا يهمل .. علشان غير كده الحياة كانت هت تبقى مقرفة جدااااااااااااااااااااا ..

شدوا حيلكوا .. سلام عليكوا


- - - { التوقيع } - - -

Helou very topic and I want your responses P Display الموضوع حلو جدا وعايز اعر ف ردودكم