أنـا ... أذن أنـا ... ؟؟, أنطـــــلق .. مع خدمة كلام لذيذ المميزه

أنا أعمل بـ ضمير أذن أنا ميه ميه ..

ثقافة الفهلوة واروح الشغل أمضى واخلع ولا أنضف الخضار هناك ولا اقعد على النت 3 ساعات على كومبيوتر الشغل ...
دى مش شطارة ده غش . أنت تعمل بضمير لما مهنتك تبقى أول حاجة تقولها بعد اسمك . لما مهنتك تكون سبب أنك فخور بنفسك و اولادك فخورين بيك ، ومراتك وأمك وحتى جارك فخور ان فولان يبقى ساكن جنبه .. أحساسك بذاتك وقيمتك الحقيقية ... شغلك الحاجة اللى محدش يقدر يمنحها لك ، انت بس اللى تقدر تمنحها لنفسك .


أنا احب أذن انا ...؟؟

سعيد ولا مجنون ولا غبــى ولا عادى ... الحب المفروض يمنح صفة ايه للى بـ يمارسه ... من جوا قلبى مصدقة ان الحب احلى حاجة ربنا أداها للأنسان ( بعد الأكل طبعاً ) علشان روحه تسمو وتعلى وتشوف الأمور فى حجمها الحقيقى . تشوف أن التنافس لازم يكون شريف وتشوف ان القيم والمبادىء حقيقة مش مجرد عناوين جرايد فى حملة انتخابية ... ويطلع بعد كده كلام الليل مدهون زبدة .. الحب بـ يلون الكون ويسمعنا العصافير و يورينا جمال البحر ... بس مين يقرا ومين يسمع , المحظوظين بس هم اللى بـ يقابلوا فى حياتهم الحب الحقيقى الأصلى مش الصينى اللى فى محلات كله بـ 2.50 جنيه .


أنا أحلم , لازم و ضرورى

افتح مسام روحك وقلبك وعقلك وكل كيانك واحلم ببكره أفضل وبحب اجمل وبحالة من الأشباع والرضا عن كل مفردات حياتك . أتمرد على الواقع ، أرفض اشجب اعترض وامسك قوسك وسهمك ونشن على السما ، ما تبصش تحت رجلك بص لبعيد لفوق لقدام ، وما تخافش . أى فكرة عظيمة وناجحة وعملاقة كانت حلم ، مجرد حلم مجرد فكرة . كل الاختراعات : التيلفون والاسانسير والطيارة ... كانت احلام فى عقول رفضت الواقع وقررت تغييره ، ذاكرت وتعبت واجتهدت وقدرت تحقق اللى فى خيالها ... وارجوكم ما تعتبروش ده تناقض مع فكرة اليأس الذكى أو ذكاء الاستسلام فى اللحظة الصح . ما هو فيه كده وفيه كده ... ولا أيه .


أنا أيأس ...

المهم أيأس امتى وليه وازاى .. السيد نابليون قال مفيش مستحيل ، لكن لأ ساعات فيه حاجات مستحيلة ، أحلام ما ينفعش تدخل حيز التنفيذ لـ 100 سبب أهمهم و أولهم أنه ربنا عايز كده . اخبط راسك فى الحيط
يا بنى أدم أخدت بـ الاسباب وعملت اللى عليك لآخر الآخر وما حصلش خلاص . ما هو الاستسلام والبحث عن بدائل فى لحظات بـ يكون قمة الحكمة وقمة النظرة المستقبلية ... بلاش التناحة فى حاجة مش هـ ييجى منها . العمر مجرد رقم ؟ .. لأ طبعاً العمر سنين تجارب وخبرات ولحظات مليانة وجع وفشل ونجاح وتحدى وانهزام وانكسار ... كل لحظة بـ تضيف لرصيدك من الآنسانية يبقى مجرد رقم ازاى ؟!



أنا أحتاج أذن أنا ناقـــص ...

الاحتياج صفة أنسانية مفيش مشكلة ، لكن الحكاية مش فى المطلق . ما ينفعش أحتاج حد علشان أحس بـ الرضا عن نفسى فى عيونه . لآزم أكتمل الأول على المستوى الفردى علشان لما أكون مع حد تبقى علاقة سوية ممتعة مش علاقة قائمة على الأحتياج . لكن أحتاج حضن أمى وحنان أبويا ومراعاة جارى وتقدير رئيسى فى العمل ... كل ده أحتياج حميد والناس لبعضها ، المهم ان الاحتياج ما يتحولش لحوجة .



أنا أشك أذن أنا عايش ...

انا بطبعى شكاك ما بـ صدقش الناس ، ما بـ صدقش العبارة الشهيرة بتاعة " الدنيا لسه بخير " . يعنى مرات معدودة
اللى حسيت أنها صح ، لكن كل سنينى بـ تقول لأ الدنيا مش بخير .



أنا أكره أذن أنا غبــــى ...

على فكرة الكراهية علاقة زيها زى علاقة الحب بالضبط . اللى بـ تكرهه موجود فى حياتك ، بـ تفكر فيه ، كل حركة منه بـ تأثر عليك ; مشاعرك بـ تشتغل ، جهاازك العصبى بـ يشتغل ، ضربات قلبك بـ تزيد ... زى الحب بالضبط . الكراهية بـ تاكل فى اللى بـ يمارسها وتحرق قلبه وتاخد طاقته . وأى أحساس حلو ناحية الحياة بـ يروح ويقول له
باى باى ...

Helou very topic and I want your responses P Display الموضوع حلو جدا وعايز اعر ف ردودكم