حـوار "صينـــى" متحضـر !, زيرو سكـــر

حـــوار
" صينــــى "
متحضـــــــر !


وانا بـ قلب فى التيلفزيون عديت كده على القناة الفضائية الصينية الناطقة بـ الأنجليزية مش بـ الصينى ولا حاجة
المهم لقيت حوار بين المذيع صاحب البرنامج ( وهو شخص صينـى ) والضيف ( رجل أمريكانى ) كان كاتب تقريباً
أو مفكر أو حاجة كده . أنا ما شفتش الحوار من الأول فما عرفتش ... بـ يتكلموا عن أيه بقى ... طلعوا جملة كده على الشاشة مكتوب عليها An atheist versus a christian واحد ملحد فى مواجهة واحد مسيحى .

يا سلااااااااااام قاعدين بقى الأتنين دول اللى بـ يتكلموا عن موضوع عقائدى دينى فلسفى بيبنى عليه وجهات نظرهم فى الحياة كلها ، زى ما يكونوا بـ يتكلموا عن المصيف ! هدووووووووووء .... ومبتسمين وبـ يتكلموا بالراااحة ..
وحاجة تانية كمان غريبة جداً ، تصورا ان كل واحد فيهم بـ يستنى لما التانى يخلص كلام وبعدين يتكلم هو !! والله العظيم كانوا بـ يعملوا كده أنا ما بقتش مصدق لأنى غصب عنى قفز الى ذهنى أقرب مشهد عندنا للمشهد ده ... لما تفتح التليفزيون كده وتلاقى شيخ مثلا فى مواجهة حد من الشيعة ولا حد من البهائيين . أشمعنى دول بـ يتكلموا بالراحة وبعقل كده واحنا عندنا بـ يبقوا السادة الضيوف فى معظم الأحيان طول الحلقة دى على وشك أنهم يتشابكوا بـ الأيدى وساعات تانية الحقيقة بـ يبقوا بـ يتضنعوا التحضر وبـ يحاولوا يتكلموا بالرااحة ويقولوا " مع احترامى " وبتاع بس الكلام بـ يبقى طالع من بقهم سم زعاف .

الملحوظة التانية على الحوار الصينى اللى انا اتفرجت عليه ده ان الناس دول قاعدين مع بعض بـ يتكلموا ليه ؟؟
مش زى عندنا ... احنا عندنا بـ يتكلموا علشان كل واحد يثبت ان التانى حمار وفاشل وغبى ولازم كل اللى فى راسه يترمى فى الزبالة ، ويستحب يموت أصلاً . التانيين كانوا بـ يتكلموا علشان كل واحد يقول هو شايف الموضوع ازاى ويسمع كويس وجهة النظر اللى عكس وجهة نظره 180 درجة ، علشان يفهمها ... علشان يستوعبها ... علشان حتى يعرف يستعملها فى دعم وجهة نظره هو . زى ما تقولوا كده علشان يستفيد منهـا ..

وتكتشف بسهولة ان أى اتنين بـ يتكلموا بالمنطق ده هـ يكسبوا من الحوار اللى حصل واى ناس يتكلمواعلشان يتخانقوا ، الأتنين هـ يخسروا من الحوار اللى حصل ...

وكل ده باين مش فى شكل الحوار بس ، لأ كمان فى المواضيع وفى نوع الأسئلة وفى طريقة الأجابة وفى المقارنات اللى عملها المذيع والضيف بين وجهات نظرهم ، كل واحد عايز يبيع للمشاهد وجهة نظره آه . بس بطريقة مختلفة جداً عن اللى نعرفه .

هنيـئاً لكل الناس اللى بـ يعرفوا يسمعوا بعض وهم بـ يتكلموا ...
وتعساً لنا طول ما أحنا مش عايزين نتعلم منهم حاجة ...

بس

Helou very topic and I want your responses P Display الموضوع حلو جدا وعايز اعر ف ردودكم